Tuesday, March 23, 2010

ممنُوع الحَرِيم يُدخلُوا

فتحت الفيس بوك تبعي عم بشيك على الفعاليات إللي حتصير هادا الأسبوع عشان أحضر و لقيت زميلتي هوازن مأكدة حضور على أحد الفاعاليات فقرأت العنوان و عجبني ففتحت على صفحة الفعالية عشان أقرأ التفاصيل و عجبتني المعلومات فقررت أحضر و أكدت الحضور بعد ماتأكدت إنو الحضور مفتوح للجنسين و انبسطت كتير لإنو أغلب المحاضرات الحلوة بتكون للرجال بس


مكتوب من ضمن المعلومات إنو المحاضرة بتبلش الساعة ستة ونص مساء فروحت على البيت بس خلصت شغل الساعة ثلاثة ونص وعلى بال ماوصلت البيت على الساعة أربعة فتحت التلفزيون عشان أتفرج على مسلسل صرخة حجر على قناة الإم بي سي هادا المسلسل التركي المدبلج إللي بحكي عن الصراع بين الفلسطينيين و إسرائيل و خلص على الساع ستة و عشرة و بعدين إتغديت ساندويشة تونة و بيبسي ولا أحلى.. بجية باب من برة فسألتو و إذا بقدر يوصلني على المحاضرة لإنو صايم و بدو يفطر بهالوقت فوافق فحكالي جيبيلي العنوان فاتصلت على الجمعية و حكيت مع المديرة و كانت كتير حبابة على التليفون و أعطتني العنوان بالتفصيل كان كتيير واضح لبابا العنوان..

قمت إلبست واطلعنا بالسيارة واندلينا على المكان بسرعة.. كتير كان سهل الوصف.. بابا بعادتو لما بوصلني على أي مكان بستنى شوي بس أدخل الباب و صدفت إنو بس و صلنا حكالي إتأكدي إذا موجودين الجماعة و أنا هيني على الباب.. فحكيتلو خلص روح كيف يعني أتأكد إذا في محاضرة أو لأ!! الناس عاملة إعلان و أنا هلأ كنت بحكي المديرة و هي إللي أعطتني العنوان يعني مش أي أحد.. خلص روح إتوكل على الله يابابا خلص... طيب شوفي و هيني هون.. يا الله يا بابا منك طيب هلأ بسأل و برنلك من جوا و بعدين هي الشباب مبينين من الباب القزاز فخلص هيهم موجوديين.. فتحت الباب ونزلت من السيارة و لقيت واحد أسمر ضخم جاي على الباب القزاز و بركض على جهتي .. على جهة الباب.. و بأشر لبابا بإيدو.. إستنى شوي إستنى شوي.. فخطر على بالي بدو يحكي لباب مدخل النساء من الخلف كالعادة!! مالقيت غير رجال أسمر ضخم واقف بخلقتي و بحكيلي مافي مافي.. إيش هو إللي مافي يارجال؟ الفعالية إلتغت؟ الباب من الخلف؟ إيش في يارجال؟ إطلع في و إحكي وخبرني شوفي بدل ما إنت قاعد تأشر لبابا؟ فرصة يعني تحكيلي إيش في ياحضرة؟؟؟ فجأة وبكل برود بحكيلي إنو ممنوع الحريم يحضروا هادي المحاضرة بس للرجال!!!!!!! نعمممممم!! معلي مااسمعت!! عييد مرة تانية؟؟ شوحكييت؟؟ ممنوع؟؟ حريييم؟ إيش؟؟ إنت بتحكي معي ولا مع نفسك؟؟ بس كيف يعني ممنوع؟؟ إنتوعامليين إعلان و كتبتو إنو الحضور للجنسين و بعدين أنا لسة حاكية مع مديرتكم و خبرتني العنوان وماحكتلي إنو ممنوع الحريم يحضرو!!! قلتلك مافي حرييم!! طيب خلاص فهمت مافي زفت بس لاادف!! وجع.. مع نفسك.. إيش التخلف هادا.. مجتمع متخلف.. ناس غبية.. رجعت للسيارة وأول سؤال؟ ليش رجعتي؟ قال مافي للبنات لحظة شوي.. بابا عصب ياالله عليكي.. ألو مرحبا كيفك؟ بدي أسألك أنا وصلت بس حكولي على الباب مافي للبنات.. لأمين قال دا الكلام؟ إلا طبعا البنات يقدروا يدخلوا مين قالك كده؟ رجال الأمن إللي على الباب وماخلاني أدخل كمان.. طيب أديني دقيقة أنا دحين أكلمهم وأشوف إيش الحكاية وأردلك خبر.. بعد خمس دقايق.. إيوا ياديانا إستني شوية في السيارة الظاهر إنو الهيئة فجأة قالتلهم ممنوع الحريم تحضر دحين هما بيتصلوا بالتليفون عشا يتأكدو ويردولي خبر إنت بس إيتنس في السيارة.. لا لا خلص حبيبتي شكرا أنا مع بابا بالسيارة و مش حقدر أستنى خلص بسطة مرة تانية إن شاءالله شكرا.. معلي ياديانا مرة آسفة مني عارفة إيش أقلك؟؟ لا حبيبتي بسيطة حصل خير بلا مع السلامة نراكي

الله يديمك ياهيئة فوق راسنا ويكتر من أمثالك إنتو أكتر ناس فاهمينا و مقدرينا كمان.. الله لايحرمنا منك.. على راسي والله.. آل شو آل ممنوح الحريم تحضر!! طبعا وهي الحريم تحضر لي؟؟ مافي داعي!! يعني هم الحريم ناقصهم ثقافة ولاعلم ولا حضارة!! ماهما نزلو من بطون أمهاتهم مثقفين شو بدهم بالمحاضرات و الحكي الفاضي هادا.. شو بتحكي يازلمة

بس أحلى إشي وين؟؟ إني لما روحت على البيت حكت معي صاحبتي هوازن وخبرتني إنو في معرض لفنان تشكيلي و رايحين يحضروا فحملت حالي زي الشاطرة ورحت عشان أنا مانزلت من بطن إمي مثقفة وحابة أحضر.. وأخدتلي تاكسي على السريع ووصلت المعرض وإيش لقيت هناك ياحزركم؟؟ المكان مختلط و صور لبعض النساء كاشفين شعورهم و رقبة المرأة في الشارع و بطنها بحكيلك ها انا ذا.. و الفنان بحكي مع الفنانة و النقاشات مستمرة و لا أحلى من هيك إختلاط

نعم أصبح الإختلاط مشروعا في هذه الأماكن.. أما في الأماكن الأخرى فهو محرم شرعا إختلاط الحريم بالرجال!! والله ما إلي غير أحكيلك الله يديمك فوق راسنا ياهيئة إلى الامام إلى الإنحراف والإنخراط والفساد والرجعية.. أهنئك فعشرة على عشرة قليلة عليك فأنت تستحقيين مسابقة نوبل للسلام!! روحي يا شيخ إلك الله 

1 comment:

  1. كلام واقعي..لكن هل نحن بحاجة لمثل هذا السرد للواقعه وبهذا التفصيل...صدقا؟

    ReplyDelete